შრომითი უფლებების დამცველი, საქართველოს პროფკავშირების გაერთიანების თავმჯდომარის მოადგილე რაისა ლიპარტელიანი 17 წელზე მეტია შრომით უფლებებზე მუშაობს და მნიშვნელოვანი წვლილი მიუძღვის პროგრესში, რომელსაც საქართველომ ამ თემის ირგვლივ მიაღწია.

75 წლის მადონა ხარებავა შეზღუდული შესაძლებლობის მქონე ქალთა და შეზღუდული შესაძლებლობის მქონე ბავშვთა დედათა ასოციაცია „დეას“ თანადამფუძნებელი და აღმასრულებელი დირექტორია. 1998 წლიდან ის მათი უფლებების დაცვაზე მუშაობს.

25 წლის გოჰარ აღჯოიანი ფსიქოლოგი ტრენერი და არაფორმალური განათლების აქტივისტია. ის ეთნიკური უმცირესობებით დასახლებულ რეგიონში ცხოვრობს და თანატოლებში, განსაკუთრებით კი გოგოებში სწავლის პოპულარიზაციასა და ხელმისაწვდომობაზე მუშაობს.

23 წლის აისელ აჯალიევა, გრიგოლ რობაქიძის სახელობის უნივერსიტეტის მედიცინის ინგლისურენოვანი პროგრამის სტუდენტი და თბილისის ცენტრალური საავადმყოფოს რეანიმაციის ექთანია.

50 წლის ელისო ჯანაშია სამოქალაქო აქტივისტი და სამოქალაქო პლატფორმის „ფოთელები საკუთარი უფლებებისთვის“ დამფუძნებელია.

მასწავლებელი და არასამთავრობო ორგანიზაცია „მწვანე რეგიონების“ პროექტების კოორდინატორი, 45 წლის მარიეტა ლეთოდიანი განახლებადი ენერგიის პოპულარიზაციაზე მუშაობს.

აღსანიშნავია, რომ 17 ქვეყანას შორის საქართველოც მოხვდა და 2-5 ივლისს, თბილისში, გაეროს საქართველოს წარმომადგენლობასთან თანამშრომლობითა და გაეროს ქალთა ორგანიზაციის ტექნიკური მხარდაჭერით, საქართველოს პარლამენტის ეროვნულ ბიბლიოთეკაში გამოფენა „17 პორტრეტი - ქალები მოქმედებენ“ გაიმართა.

საფრანგეთის საელჩომ საქართველოში, გაეროს ქალთა ორგანიზაციისა და გაეროს მოსახლეობის ფონდის ოფისებმა სამოქალაქო საზოგადოების ფორუმზე გლობალური მოძრაობა „თანასწორობის თაობა” წარადგინეს.

თანასწორობის მიღწევისა და გაეროს მდგრადი განვითარების მიზნების განხორციელებისთვის, გაეროს ქალთა ორგანიზაციამ პეკინის დეკლარაციისა და სამოქმედო გეგმის მიღების 25 წლისთავზე გლობალური კამპანია „თანასწორობის თაობა“ წარადგინა. ინიციატივის მიზანი გენდერული თანასწორობის მიღწევის წამოწყებებში უფრო მეტი ახალგაზრდა აქტივისტისა და მომავალი ლიდერის ჩართულობაა.