რას ფიქრობენ საქართველოში გენდერულ თანასწორობაზე - გაეროს ქალთა ორგანიზაციამ ახალი კვლევა წარადგინა

როგორია გენდერული თანასწორობის მიმართ საქართველოს მოსახლეობის დამოკიდებულება და რამდენადაა გავრცელებული გენდერული სტერეოტიპები, რომლებიც ქვეყანაში გენდერულ უთანასწორობას უწყობს ხელს - გაეროს ქალთა ორგანიზაციის ახალი კვლევა სწორედ ამ ტენდენციებს წარმოაჩენს.

„გენდერული თანასწორობის მიმართ დამოკიდებულების კვლევა საქართველოში“ ცხადყოფს, რომ თითქმის ყველა 16 წელზე უფროსი ადამიანი საქართველოში (95%) ქალთა დასაქმებაზე მინიმუმ ერთ გენდერულ სტერეოტიპს იზიარებს, 75% -ზე მეტი კი ამგვარ სტერეოტიპს იზიარებს ქალთა პოლიტიკური მონაწილეობის, ქალთა მიმართ ძალადობის და ოჯახში როლების გადანაწილების შესახებ. აღსანიშნავია, რომ შედეგების თანახმად, ქალები, ახალგაზრდები, დასაქმებული პირები და უმაღლესი განათლების მქონე ადამიანები სხვებზე მეტად ემხრობიან გენდერულ თანასწორობას და მხარს უჭერენ ქალთა გაძლიერებას.

კვლევის პრეზენტაცია 18 მარტს, თბილისში გამართულ კონფერენციაზე „გენდერული თანასწორობა საქართველოში - რას გვაჩვენებს უახლესი კვლევები“ შედგა, გაეროს მოსახლეობის ფონდისა და გაეროს განვითარების პროგრამის თემატურად დაკავშირებულ სხვა კვლევასთან ერთად. ღონისძიება ქალთა საერთაშორისო დღის წლევანდელ თემას „ყველა ქალისა და გოგოსთვის: უფლებები. თანასწორობა. გაძლიერება“ ეხმიანებოდა და მას საერთაშორისო ორგანიზაციების, სამოქალაქო საზოგადოების, აკადემიური წრეების და კერძო სექტორის წარმომადგენლები დაესწრნენ.

“გაერთიანებული ერების ორგანიზაცია მტკიცედ უჭერს მხარს საქართველოში ქალებისა და გოგოების უფლებების დაცვას და არსებითი გენდერული თანასწორობის მიღწევას. სოლიდარობას ვუცხადებთ ყველა ქალსა და გოგოს. ვითხოვთ კონკრეტულ ნაბიჯებს მათი უფლებების დაცვისა და მეტი შესაძლებლობების შექმნისთვის, რათა საქართველომ შეძლოს ისეთი მომავლის აშენება, სადაც არავინ დარჩება განვითარებისა და წარმატების მიღმა. ახალგაზრდა თაობის გაძლიერება და ხელშეწყობა ამ ხედვის განუყოფელი ნაწილია, რადგან სწორედ ახალგაზრდები წარმოადგენენ მდგრადი ცვლილების მამოძრავებელ ძალას“, - განაცხადა გაეროს მუდმივმა კოორდინატორმა საქართველოში დიდიე ტღებიუკმა.

კვლევის შედეგების მიხედვით, საქართველოს მოსახლეობის უმრავლესობა (83%) ეთანხმება მოსაზრებას, რომ ანაზღაურებადი სამუშაო საუკეთესო საშუალებაა ქალისთვის, იყოს დამოუკიდებელი, თუმცა პარადოქსულია, რომ 71% აზრით, ქალები ნაკლებს უნდა მუშაობდნენ და ოჯახზე ზრუნვას მეტ დროს უთმობდნენ. ამავდროულად, 69% ფიქრობს, რომ დედის მუშაობას ბავშვები მძიმედ განიცდიან. მამების მუშაობის შემთხვევაში, ეს მაჩვენებელი მხოლოდ 16%-ია. მოსახლეობის 63%-ს სჯერა, რომ პოლიტიკაში ქალების ჩართულობის გაზრდა ქვეყანას სარგებელს მოუტანს, თუმცა 49% ფიქრობს, რომ ქალთა პოლიტიკური მონაწილეობის ყველაზე დიდი წინაღობა ოჯახური ვალდებულებებია.

აღსანიშნავია, რომ კვლევამ გამოავლინა განსხვავება ინდივიდუალურ დამოკიდებულებებსა და მოსახლეობის მიერ სოციალური ნორმების აღქმას შორის. ინდივიდუალურ დონეზე საქართველოს მოსახლეობის შეხედულებები გენდერული თანასწორობის შესახებ უფრო პროგრესულია, ვიდრე მათი წარმოდგენები და მოლოდინები, თუ როგორ ფიქრობს საზოგადოება გენდერული თანასწორობის სხვადასხვა საკითხზე.

მაგალითად, მოსახლეობის 91% ამბობს, რომ არ არსებობს გარემოებები, რომელთა გამოც ადამიანმა შეიძლება პარტნიორს დაარტყას, თუმცა ნაკლებს (78%) მიაჩნია, რომ ხალხის უმეტესობაც იმავეს ფიქრობს. მოსახლეობის 74% არ ეთანხმება მოსაზრებას, რომ ცოლ-ქმარს შორის ძალადობა პირადი საქმეა და სხვები არ უნდა ჩაერიონ, ნაკლებს (59%) სჯერა, რომ ეს მოსაზრება მათ ირგვლივ ხალხის უმეტესობისთვისაც მიუღებელია. გამოკითხულთა მხოლოდ 42% ეთანხმება ტრადიციულ მოსაზრებას, რომ ოჯახის მთავარი მარჩენალი კაცი უნდა იყოს, ხოლო ოჯახის მოვლა ქალის პასუხისმგებლობაა. თუმცა, უმრავლესობას (57%) მიაჩნია, რომ ამ შეხედულებას საქართველოში ადამიანების უმრავლესობა იზიარებს.

კვლევა 2024 წლის იანვრიდან თებერვლამდე პერიოდში, გაეროს ქალთა ორგანიზაციის დაკვეთით, CRRC-საქართველომ ჩაატარა. კვლევა წარმოადგენს პროექტის „ქალთა ლიდერობა დემოკრატიისთვის საქართველოში“ ნაწილს, რომელიც შვეიცარიის განვითარებისა და თანამშრომლობის სააგენტოს ფინანსური მხარდაჭერით ხორციელდება.