ახალგაზრდა მკვლევრები დროის გამოყენების მონაცემებზე იმუშავებენ
თარიღი:
გენდერული სტატისტიკა და სრულყოფილი, ხარისხიანი მონაცემების შეგროვება, რომლებსაც გენდერული თანასწორობის ხელშემწყობი გადაწყვეტილებები უნდა დაეყრდნოს, გლობალურ გამოწვევას წარმოადგენს. გამონაკლისი არც საქართველოა, ამიტომ გაეროს ქალთა ორგანიზაცია ქვეყანაში გენდერული სტატისტიკის გასაუმჯობესებლად სხვადასხვა ინიციატივას ახორციელებს.
გენდერული მონაცემების პოპულარიზაციას, მათ ანალიზსა და პოლიტიკის დაგეგმვაში გამოყენებას ემსახურებოდა ტრენინგი, რომელიც გაეროს ქალთა ორგანიზაციამ და CRRC-საქართველომ ახალგაზრდა მკვლევრებისთვის 19-21 მარტს ჩაატარეს.
ტრენინგს 20-ზე მეტი მონაწილე დაესწრო. მათ შორის იყვნენ მოქმედი მკვლევრები, აკადემიური წრეებისა და არასამთავრობო სექტორის წარმომადგენლები, ასევე, სხვადასხვა ფაკულტეტის მაგისტრატურისა და დოქტორანტურის სტუდენტები, რომლებიც გენდერული სტატისტიკით არიან დაინტერესებულები.
ტრენინგის მთავარ მიზანს დროის გამოყენების მონაცემების ანალიზის სწავლება და მათი გამოყენებით გენდერული თანასწორობის შესახებ კვლევითი ინიციატივების ხელშეწყობა წარმოადგენდა. ტრენინგის მიმდინარეობისას მონაწილეებმა გაეროს ქალთა ორგანიზაციისა და საქსტატის მიერ 2020-2021 წელს ჩატარებული დროის გამოყენების კვლევის მონაცემები გააანალიზეს. განხილულ საკითხებს შორის იყო საქართველოს მოსახლეობის მიერ აუნაზღაურებელ ზრუნვაზე, ანაზღაურებად შრომაზე, დასვენებასა თუ გართობაზე დახარჯული დრო და ამ კუთხით არსებული გენდერული განსხვავებები.
ფსიქოლოგი მარიამ კვიციანი თბილისის ივანე ჯავახიშვილის სახელმწიფო უნივერსიტეტის (თსუ) კვლევებშია ჩართული. ტრენინგის გავლის შემდეგ ის მიღებული ცოდნის გამოყენებას აქტიურად გეგმავს: „ნებისმიერი მცდელობა, რომელიც საერთაშორისო დონის კვლევის ჩატარებისთვის საჭირო კომპეტენციას მოგცემს, ძალიან მნიშვნელოვანია. ამ ცოდნისა და უნარების მიღების შემდეგ უკვე შემიძლია შევქმნა ჩემთვის საინტერესო კონკრეტული პროდუქტი, რომელიც მერე პოლიტიკის დოკუმენტის შემუშავებას, მონაცემებზე დაფუძნებული კონკრეტული ნაბიჯების დაგეგმვას დაეხმარება“, - აღნიშნავს მარიამ კვიციანი.
მისი კოლეგა და თსუ-ს ასისტენტ-პროფესორი ნათია სორდია კი დასძენს, რომ დროის გამოყენების კვლევამ მას, როგორც მკვლევარს, ახალი პერსპექტივები დაანახა: „ამჟამად კრეატიული მიღწევების კუთხით არსებულ გენდერულ განსხვავებებს ვიკვლევ. ვსწავლობ, რატომ აქვთ კრეატივის სფეროში კაცებს, ქალებთან შედარებით, უფრო მეტი გაყიდვები მაშინ, როცა მათი პოტენციალი თანაბარია. ვფიქრობ, ძალიან საინტერესო იქნება საკითხის აუნაზღაურებელი ზრუნვის შრომის არათანაბრად გადანაწილების ჭრილში გაანალიზებაც. ეს სრულიად ახალ პერსპექტივას შესძენს ჩემს კვლევას“, -აღნიშნა მან.
საგულისხმოა, რომ ტრენინგის შემდეგ შერჩეული მონაწილეები მცირე გრანტებს მიიღებენ და დროის გამოყენების მონაცემებზე დაყრდნობით, კვლევით ნაშრომებსაც მოამზადებენ. გაეროს ქალთა ორგანიზაცია კი გენდერული მონაცემების შესახებ ტრენინგებს კვლავაც განაგრძობს.
ტრენინგი ჩატარდა პროექტის „ქალთა ლიდერობა დემოკრატიისთვის საქართველოში“ ფარგლებში შვეიცარიის განვითარებისა და თანამშრომლობის სააგენტოს და გაეროს ქალთა ორგანიზაციის გლობალური პროგრამის „ყველა ქალი და გოგო მნიშვნელოვანია“ ფინანსური მხარდაჭერით.