დევნილი ქალები მდგრადი მეწარმეობის შესაძლებლობებს ეცნობიან

თარიღი: პარასკევი, 12 მაისი, 2017 წელი

რა ბიზნესშესაძლებლობები აქვთ რეგიონებში მცხოვრებ დევნილ ქალებს და როგორ შეიძლება მცირე ფინანსებით მეწარმეობის დაწყება? - ამ საკითხებს გაეცნო იძულებით გადაადგილებული 17 პირი სამდღიან ინტენსიურ ტრენინგზე „დევნილი ქალების მდგრადი მეწარმეობის ხელშეწყობა“.

ტრენინგი 10-12 მაისს, სოფელ მისაქციელში, გაეროს ქალთა ორგანიზაციისა და მისი პარტნიორის, ქალთა ფონდ „ტასოს“ ინიციატივით, ევროკავშირის ფინანსური მხარდაჭერითა და სოფლად თემთა განვითარების სააგენტოს უშუალო მონაწილეობით ჩატარდა. სააგენტოს წარმომადგენლებმა სამეგრელოს, იმერეთისა და შიდა ქართლის რეგიონებში მცხოვრებ დევნილებს ბიზნესშესაძლებლობების გაუმჯობესების ეკომდგრადი ტექნოლოგიები, მცირე ბიზნესის დასაწყებად სასოფლო-სამეურნეო რესურსებისა და ბიომასის ნარჩენების გამოყენების საშუალებები და საფეხურები გააცნეს.

„ჩვენ ყველა ის შესაძლებლობა წარმოვაჩინეთ, რომელიც დღეს საქართველოს სხვადასხვა რეგიონში ქალების ეკონომიკური და სოციალური გააქტიურებისთვის არსებობს. მონაწილეები იმ უპირატესობებს, წარმატების შანსებსა და ეკონომიკურ ეფექტსაც გაეცნენ, რაც კოოპერატივების შექმნას უკავშირდება. აღსანიშნავია, რომ ბევრ მონაწილეს უკვე ბიზნესის იდეა გაუჩნდა და საპროექტო წინადადების დაწერასაც გეგმავს. ეს ჩვენი მნიშვნელოვანი მონაპოვარია“,- განაცხადა სააგენტოს ხელმძღვანელმა როსტომ გამისონიამ და სამომავლოდ მონაწილეებთან მუშაობის გაგრძელების სურვილი გამოთქვა.

აღსანიშნავია, რომ ტრენინგის დამსწრე დევნილი ქალები იძულებით გადაადგილებული პირების კოოპერატივს „ტყის ნობათს“ ეწვივნენ, მცირე ფინანებით დაარსებულ საწარმოს მოდელს ადგილზე გაეცნენ და მისი შემქმნელების გამოცდილებაც გაიზიარეს. ტრენინგის ბოლოს კი მათ მცირე გრანტების მისაღებად ახალ იდეებსა და წამოწყებებზე იმსჯელეს.

ნინო მეშველიანი, რომელიც წყალტუბოში ცხოვრობს, ერთ-ერთი მათგანია, ვისაც საკუთარი ბიზნესიდეის განხორციელების სურვილი ტრენინგმა კიდევ უფრო გაუღრმავა: „ჩირის წარმოება მაინტერესებს. ამ სამი დღის განმავლობაში იმდენად სასარგებლო ინფორმაცია მივიღე, რომ ჩემი ჩანაფიქრის წარმატებულ რეალობად ქცევა კიდევ უფრო მომინდა. მსურს, ეს იდეა ჯგუფთან ერთად განვახორციელო. თანაც, ერთ მეგობარს მიწის ნაკვეთი აქვს. შესაძლოა, იქ ლურჯი მოცვი მოვიყვანოთ და ჩაიც ვაწარმოოთ“,-ამბობს ნინო. კიდევ ერთ მონაწილეს სამეგრელოდან, სვეტლანა ხინთბაიას კი დაფნის გაშრობა, წარმოება, პროექტში სხვა დევნილი ქალების ჩართვა და მათი დასაქმება სურს.

დევნილი ქალები საკუთარ თემებში დაბრუნების შემდეგ ტრენინგზე შეძენილ ცოდნას სხვებს გაუზიარებენ. ეკა დაუდაშვილი, აღნიშნავს, რომ მიღებული ინფორმაცია სამომავლოდ სხვადასხვა პროექტში მონაწილეობაში დაეხმარება: „ჩემთვის ძალიან მნიშნველოვანი იყო იმის გაგება, თუ რა არის საჭირო ბიზნესპროექტის დასაწერად, რაზე უნდა გავამახვილო ყურადღება და როგორ წარმოვაჩინო ის უპირატესობები, რომლებიც პერსპექტივაში პროექტის განხორციელებას დაეხმარება. ამ ცოდნას ყოველთვის გამოვიყენებ. თანაც, აქ მოსმენილი შემიძლია ბევრ ადამიანს არა მარტო გავუზიარო, არამედ იდეების განხორციელებაშიც დავეხმარო“,- ამბობს ეკა.

ტრენინგი „დევნილი ქალების მდგრადი მეწარმეობის ხელშეწყობა“ პროექტის „საქართველოში იძულებით გადაადგილებულ პირთა თანაბარი ხელმისაწვდომობა ეკონომიკურ შესაძლებლობებზე“ ჩატარდა, რომელსაც გაეროს ქალთა ორგანიზაცია და გაეროს სურსათისა და სოფლის მეურნეობის ორგანიზაცია ევროკავშირის დაფინანსებით ახორციელებენ. პროექტი საარსებო წყაროებზე სამართლიანი და თანაბარი ხელმისაწვდომობის უზრუნველყოფით, საქართველოში ყველაზე მეტად მოწყვლადი ჯგუფების სოციალურ-ეკონომიკური გაძლიერების ხელშეწყობას ისახავს მიზნად.